دەسەڵاتدارانی هەرێم پەلەقاژەی مانەوەیانە
پاش کۆبوونەوەی شاندەکانی مەکتەب سیاسی پارتی و یەکێتی، کۆبوونەوەیەکی دیکە بە نهێنی لە نێوان مەسرور بارزانی و بافڵ تاڵەبانی بەڕێوەچووە.
زانیارییەکان باس لەوە دەکەن کە ئەو کۆبوونەوە لە پێناو درێژەپێدانی وتووێژەکانی نێوان هەر دوو لا بووە بە ئامانجی واژۆکردنی ڕێکەوتنێکی نوێ کە ببێتە شوێنگرەوەی ڕێکەوتنی ستراتیژی.
پارتی و یەکێتی کە لە هەڵبژاردنەکانی داهاتووی پەرلەمانی کوردستان پێگەی خۆیان بە لاواز دەبینن و لە لایەنی دیکەی وەک نەوەی نوێ دەترسن، بە هەر شێوەیەک هەوڵ دەدەن خۆیان لە سەر کورسی دەسەڵات بهێڵنەوە. مەسرور بارزانی و بافڵ تاڵەبانی کە تا دوێنێ دەستیان لە سەر ماشە بۆ یەکتر بووە، ئێستا دەیانەوێت پارتی و یەکێتی ئەو ڕێکەوتنە واژۆ بکەن تا مانەوەیان لە سەر حوکمی هەرێم بۆ ساڵانێکیتر دەستەبەر بکات.
ئەزموونی سیاسی هەرێمی کوردستان دەریدەخات کە پارتی و یەکێتی هەر کات هەست بە مەترسی و لە دەستدانی پێگەی خۆیان بکەن، هەموو ناکۆکییەک بە لاوە دەنێن و دەبنەوە هاوپەیمان بۆ دابەشکردنی سەروەت و سامانی کوردستان.
