گۆڕان: لە سەدا 70 ی خەڵکی هەرێم لەم دەسەڵاتە ناڕازین

ڕێکخەری ژووری پەیوەندییە دیپلۆماسییەکانی بزوتنەوەی گۆڕان ئاشکرای کردووە کە ئەمریکا لە هەرێمی کوردستان نیگەران و توڕەیە و هۆکارەکەشی ڕێکەوتنە لە گەڵ کۆمپانیاکانی ڕووسیا بە تایبەت ڕوسنەفت.

هۆشیار عومەر وتی کە ئەوەی بە سەری کورددا هاتووە لە لایەن سەرکردەکانیەوە بووە و لە ساڵی 2003 تا ئێستا لە هەڵەکانیان لە عێراق بەردەوامن و لە ناوخۆی هەرێمیش سەرەڕای ناڕەزابوونی لە سەدا 70 ی خەڵک لە شێوازی حکومڕانی ئێستا، بەڵام دەسەڵاتداران بەردەوامن و ژیانی خەڵکیان بە لاوە گرنگ نییە.

ناوبراو وتی کە هەتا ئێستا لە هەرێمی کوردستان نەوت و ئابوری و سەربازی و دیپلۆماسی بوونەتە ئامرازی بەهێزکردنی حیزب و کەسەکانی.

ئەو بەرپرسەی بزوتنەوەی گۆڕان وتی کە کورد ستراتیژ و ئاسایشی نەتەوەیی خۆیی نییە، نموونەی ئەوەی کە لە لایەن وڵاتانەوە پێش ڕیفراندۆم بۆ بەرپرسانی هەرێم باس کرا بەڵام گرنگی بە هۆشدارییەکان نەدرا و ئەو پرۆسەیە بەڕێوەچوو، هەر بۆیە لاوازبوونی ئێستای هەرێم لە ڕووی نەوت و بڕیارەکانی دادگای فیدراڵی و سیاسی و دیپلۆماسییەوە هەمووی کاردانەوەی گرنگینەدان بە وڵاتانی ناوچەکە و جیهان بووە.