کاوە عەبدولقادر: زوڵم و ستەمێکی گەورەیە، ئەو دوو حزبە لە پێشمەرگە و هێزە ئەمنییەکانی دەکەن

سەرۆکی فراکسیۆنی نەوەی نوێ لە خولی پێنجەمی پەرلەمانی کوردستان رایگەیاندووە، هۆکاری نەناردن و دواکەوتنی مووچەی هێزە ئەمنییەکان پارتی و یەکێتین. دەشڵێت، "ئەگەر ئەو دوو حزبە درۆ ناکەن و خۆیان بە خەمخۆری پێشمەرگە دەزانن، بۆچی مووچەی پێشمەرگە و هێزە ئەمنییەکان لە داهاتی ناوخۆ دابەشناکەن".

کاوە عەبدولقادر سەرۆکی فراکسیۆنی نەوەی نوێ لە خولی پێنجەمی پەرلەمانی کوردستان رایگەیاندووە، دوو مانگە پێشمەرگە مووچەی وەرنەگرتووە، هۆکاری نەناردن و دواکەوتنی مووچەی هێزە ئەمنییەکان پارتی و یەکێتین.

دەشڵێت، “ئەوەی ئەم دوو حزبە دەیکەن بەرامبەر پێشمەرگە و هێزەکانی تر، کارێکی نائەخلاقییە و دەستگرتنە بەسەر قوت و ژیانی خەڵکدا، لەبەرئەوەی تاوەکو ئێستاش ئامادەنین لیستی مووچەخۆرانی پێشمەرگە و هێزە ئەمنییەکان بە ڕێکوپێکی بنێرن بۆ بەغدا، چونکە بەدەیان هەزار مووچەی زیادە وەردەگرن کە تەنها ژمارەیە و زیادیان کردووە هیچ کەسێک و جودی نییە”.

کاوە عەبدولقادر دەشپرسێت، “ئەی داهاتی نەوت و ناوخۆ لە کوێیە ئەگەر درۆ ناکەن و خۆیان بە خەمخۆری پێشمەرگە دەزانن بۆچی مووچەی پێشمەرگە و هێزە ئەمنییەکانی لێ دابەش ناکەن؟”.

کاوە عەبدولقادر نووسیویشییەتی، بەڕاستی زوڵم و ستەمێکی گەورەیە، ئەو دوو حزبە لە پێشمەرگە و هێزە ئەمنییەکانی دەکەن.

ئەوەش لە کاتێکدایە، ماوەی دوو مانگە هێزە ئەمنییەکانی هەرێم مووچەیان وەرنەگرتووە، لەکاتێکدا ئەمڕۆ مووچەی مانگی ئایاری مووچەخۆرانی هەرێم لە بەغداوە نێردرایە سەر هەژماری بانکی حکومەتی کاربەڕێکەر، چارەنووسی مووچەکەشیان لەنێوان ململانێکانی یەکێتی و پارتیدا ماوەتەوە.

بەهۆی ئەوەی هەرێم بەڕێکوپێکى لیستى مووچەى ئەو هێزانەى نەناردووە و هاوکارى عێراقیش ناکات بۆ بەبانکیکردنى مووچە و ئامادەش نییە لیستی مووچەی هێزە ئەمنییەکان چارەسەر بکات، حکومەتی کاربەڕێکەریش هێشتا ئامادە نییە لە داهاتی ناوخۆ مووچەکانیان دابەشبکات، لەکاتێکدا تەنها ٣٣٠ ملیار دینار بۆ دابەشکردنی مووچەکانیان پێویستە.