ڕەخنەی تەند لە بوونی تاقمی چەکداری نەیاری ئێران و سووریا لە لیستی موچەی هێزەكانی پێشمەرگ

هەتا دێت ناڕەزایەتی و ڕەخنە لە بوونی ناوی هێزی چەکداری نەیاری کۆماری ئیسلامی ئێران بە ناوی پارتی ئازادی کوردستان (پاک) بە سەرکردایەتی حسێن یەزدانپەنا و لەشگەری ڕۆژ باڵی سەربازیی لایەنی سیاسی کوردی سووریا بە ناوی ئەنەکەسە سەر بە بارزانییەکان لە لیستی موچەی هێزەكانی پێشمەرگەی هەرێمی کوردستان زیاتر دەبێت.

بەرپرسێكی گۆڕان ڕایگەیاند؛ هێزی چەکداری نەیاری ئێران و سوریا لە لیستی موچەی هێزەكانی پێشمەرگەدا هەیە

رێكخەری ژوری یاسایی بزوتنەوەی گۆڕان دەڵێت: ڕادەست نەكردنی ناوی هێزە ئەمنییەكان بە بیانوی ئاسایشی نیشتمانی تەنیا بیانوە و حكومەتی هەرێم دەیەوێت بەغدا بە گۆترە موچەی هێزە ئەمنییەكان بنێرێت. دەشڵێت، هێزی “ئێرانی و سوری” لە لیستی موچەی هێزەكانی پێشمەرگەدا هەیە.

چۆمان محەمەد، رێکخەری ژوری یاسایی بزوتنەوەی گۆڕان، بە میدیای رەسمی حزبەكەی راگەیاند، هەرێم لە پێناو درێژەدان بە گەندەڵی ناوی هێزە ئەمنییەكان نادات بە بەغدا نەک لەبەر پرسی ئاسایشی نیشتیمانی.

وتیشی، هەرێم دەیەوێت بەغدا بەگۆترە موچەی هێزە ئەمنییەکان رەوانە بکات.

بەوتەی چۆمان محەمەد، هەرێمی کوردستان یاری بە کات دەکات و دەستی دەستی بە بەغدا دەکات، بەڵام دواتریش خۆی تەسلیم دەکات.

رێکخەری ژوری یاسایی گۆڕان پێیوایە بەشێکی دیکە لە نەناردنی ناوی هێزە ئەمنییەکان پەیوەستە بە بونی هێزی “ئێرانی و سوری” لە لیستی موچەی هێزەكانی پێشمەرگە، کە ئەوەش قەبارەی هێزی پێشمەرگەی زۆر کردوە و وتیشی “لە هیچ شوێنێكدا نییە هەرێمێكی شەش ملیۆنی 324 هەزار هێزی ئەمنی هەبێت.”

بۆ چارەسەری ئەو کێشەیە، چۆمان محەمەد پێی وایە “دەبێت هەرێم لیستی ناوی هێزە ئەمنییەكان رەوانەی بەغدا بکات تا ئەو کاتەی پڕۆسەی تەوتین کۆتایی دێت.”