پارە لە بەغداوە هاتووە کەچی حکومەتی هه‌رێم دەستی بەسەر مووچه‌دا گرتووە

جوڵانەوەی نەوەی نوێ رایگەیاند، سەرەڕای گەیشتنی پارە لە بەغداوە، حکومەتی هه‌رێم دەستی بەسەر مووچه‌دا گرتووە و دابەشی ناکات.

جوڵانەوەی نەوەی نوێ ئەمڕۆ شەممە 8ی حوزه‌یرانی 2024، راگەیەنراوێکی لەبارەی مووچەی مانگی ئایار بڵاوكرده‌وه‌ و تیایدا هاتووە، “وێڕای گەیشتنی پارە لە بەغداوە، بەڵام تا ئێستا حکومەتی کاربەڕێکەر خشتەی دابەشکردنی مووچەی بڵاو نەکردووەتەوە و دەستی گرتووە بەسەر ئەو پارەیەی کە لە بەغداوە هاتووە”.

به‌پێی راگه‌یه‌ندراوه‌كه‌، حکومەتی هه‌رێم کێشە بۆ مووچەی هێزە ئەمنییەکان و پێشمەرگە دروست دەکات. دەشڵێت، “ئەمە نیشانەی ئەوپەڕی ئیفلاسی ئەم دەسەڵاتەیە، کە سەرەڕای هاتنی پارە بەڵام بەردەوام کێشە بۆ مووچەخۆران دروست دەکات و سزایان دەدات، لە پێناو بەرژەوەندی دوو بنەماڵەدا”.

رۆژی پێنجشه‌ممه‌ 6ی حوزه‌یرانی 2024، وه‌زاره‌تی دارایی عێراق رایگه‌یاند، بەڕێوەبەرایەتیی ژمێریارى وەزارەته‌كه‌یان پارەى مووچەى فەرمانبەرانى هەرێمى کوردستانى خەرج کرد.

ئاماژە بۆ ئەوەکراوە کە ئەو بڕە پارەیە بۆ فەرمانبەرانى مەدەنى هەرێمى کوردستان و تۆڕەکانى چاودێرى کۆمەڵایەتیی و خانەنشینانى مەدەنى و سەربازیی و شایستەکانى کاروبارى شەهیدان و ئەنفالکراوانە و بۆ مانگى ئایارە.