هەرێمی قوتابخانە داخراوەکان
زیاتر لە ٦١ هەزار مامۆستا بەردەوام لەسەر شەقامەکان دەنگی ناڕەزایی دەردەبڕن و داوای جێبەجێکردنی داوکارییەکانیان دەکەن، لە بەرامبەریشدا حکومەتی هەرێم جگە لە بێدەنگی هیچ وەڵامێکی بۆ داواکارییەکانیان و دەستپێکی خوێندن نییە.
سەرباری داخستنی دەرگای دوو هەزار و ٢٩٩ قوتابخانە لە ناوچە جیاوازەکانی هەرێم و پەککەوتنی بەشێکی کەرتی پەروەردە لە چەند ناوچەیەک بە هۆی بەردەوامی خۆپیشاندانی مامۆستایان لە بەرامبەر دواکەوتن و وەرنەگرتنی شایستە داراییەکانیان، نزیکەی ٧٠٠ هەزار قوتابی تا ئێستا دەستیان بە خوێندن نەکردووەتەوە.
هاوکات، مامۆستایان هۆکاری داخستنی دەرگای قوتابخانەکان دەخەنە ئەستۆی حکومەتی کاربەڕێکەر کە مافی مامۆستایان نادات و بێباکە لە ئاست ئەو دۆخەی مامۆستایان و فەرمانبەرانی هەرێم بەهۆی دواکەوتنی مووچەوە رووبەڕووی بوونەتەوە.
لە لایەکی دیکەوە، کەسوکارى قوتابیان باس لەوەدەکەن، پشتیوانى مامۆستایان دەکەن بۆ بەدەستهێنانى مافەکانیان و داوا لە حکومەتی هەرێم دەکەن داواکاری مامۆستایان جێبەجێ بکات، تاوەکو دەرگای پەروەردە و فێرکردن بەرووی منداڵەکانیان بکرێتەوە.
لە هەرێمی کوردستاندا نزیکەی ملیۆنێک و ٨٠٠ هەزار قوتابی هەن، بەهۆی بایکۆتی مامۆستایانەوە لەسنووری پارێزگاکانی سلێمانی و هەڵەبجە و ئیدارەکانی گەرمیان و راپەڕین و پەروەردەی کۆیە نزیکەی ٤٠٪ـی کۆی قوتابییان دەوامیان نەکردووە.
ماوەی دوو مانگە بەهۆی دابەشنەکردن و دواکەوتنی مووچەکانیان؛ خۆپیشاندانی مامۆستایان و فەرمانبەران لە ناوچە جیاوازەکانی هەرێمەوە بەردەوامە و بە هۆی پێنەدانی مووچەکانیان مامۆستایان ناچنەوە هۆڵەکانی خوێندن و باس لەوەدەکەن، ماوەی نزیکی ١٠ ساڵە لەم دۆخەدان و چیتر بە گیرفانی بەتاڵ و دەروونی نائارامەوە ناتوانن وانە بڵێنەوە.
لە کۆتایی مانگی ١١ داین و تا ئێستا حکومەتی هەرێم مووچەی مانگی 9 ی فەرمانبەرانی دابەش نەکردووە و ئامادەش نییە بە داهاتی ناوخۆ مووچە دابەش بکات و چاوەڕێی بەغدایە پارەی بۆ بنێرێت.
جگە لە پێنەدانی مووچە، گرفتی کەمی کارەبا لە پارێزگا جیاوازەکانی هەرێم بارگرانی لەسەر ژیانی هاوڵاتیان دروستکردووە و لەوبارەیەشەوە سەرچاوەیەک راگەیاندووە کە حکومەتى هەرێم رۆژانە ٣٠٠ مێگاوات کارەبا تەنیا بە موسڵ دەفرۆشێت و ٦٠٠ مێگاواتى دیکەش بە شارەکانى دیکەى عێراق دەفرۆشێت، لە کاتێکدا هاوڵاتیان هەرێم لە ٢٤ کاتژمێردا تەنها چوار تا پێنج کاتژمێر کارەبایان پێدەدرێت.
