مەسرور بارزانی هۆکاری قوڕبەسەریی مووچەخۆرانی کوردستان
مەسرور بارزانی هەر لە سەرەتای دەستبەکاربوونی وەک سەرۆکی حکومەت لە سەر هێڵی دوژمنایەتی بەغدا و دژایەتی بەرژەوەندییەکانی گەلی کوردستان بە تایبەت فەرمانبەران و مووچەخۆران بە گشتی هەنگاوی ناوە. ئەو بەڵێنانەی کە بارزانی وەک سەرۆکی کابینەی نۆیەمی حکومەتی هەرێم دابووی بە تەواوی شکستیان هێنا و دواجار دادگای فیدراڵی عێراق بووە ئامرازی چارەسەرکردنی کێشەی مووچە، ئەگەرچی هێشتا مەسرور بارزانی بە پرۆژەی هەژماری من هەڕەشە لە چارەنووسی بەبانکیکردنی مووچەی فەرمانبەرانی هەرێمی کوردستان دەکات.
ئەوەی گرنگ بوو و فەرمانبەرانی هەرێمی کوردستان چاوەڕێیان دەکرد لە بەغداوە کرا نەک لە لایەن حکومەتی هەرێمی کوردستانەوە. بۆ خەڵک ڕوون بووەتەوە کە حکومەتە خۆماڵییەکە نەک تەنیا کێشە و قەیرانەکانی چارەسەر نەکردووە بەڵکوو هۆکاری درێژەپێدان و قووڵبوونەوەی قەیرانەکان بووە.
لە ئێستادا کە بەغدا و بڕیارەکەی دادگای فیدراڵی بوونەتە هۆکاری چارەسەربوونی کێشەی مووچە، ستافی سەرۆکی حکومەت بە خۆیان و میدیا تاڵانچییەکانیانەوە قسە و موزایدە دەکەن و دەیانەوێت مەسرور بارزانی وەک پاڵەوانی چارەسەرکردنی قەیرانەکان بناسێنن بەڵام هەوڵەکانیان شکستی هێناوە و خەڵک دەزانن ڕاستییەکان چییە.
ئەوەی ڕاستییە، هەرێمی کوردستان بە سیاسەتی نەزان و لاوازی سەرۆکی حکومەت گەیشتە قۆناغێکی مەترسیدار و تەنانەت لە هەندێک کاتدا بە هۆی تەشەنەسەندنی ناکۆکییەکان لە گەڵ یەکێتی نیشتمانی کوردستان، مەترسی لێکترازانی یەکجاری و گەڕانەوە بۆ دۆخی دوو ئیدارەیی هاتە ئاراوە. ئەم مەترسییانە بەردەوام دەبن ئەگەر پارتی و ماڵباتی مەسعود بارزانی بیانەوێت جارێکی دیکە و لە ئەگەری بەڕێوەچوونی هەڵبژاردنەکان، مەسرور بارزانی سەرۆکایەتی کابینەی دەیەم بکات.