مەحمود عوسمان: داهاتووی هەرێمی کوردستان باش نابینم

بەتەمەنترین سیاسەتمەداری کورد ڕایگەیاندووە کە داهاتووی هەرێمی کوردستان باش نییە.

مەحمود عوسمان بە ئەزموونێکی دەوڵەمەندی خەباتی شاخ و شار و پەرلەمانییەوە، ڕایگەیاندووە کە لە ئەگەری بەردەوامیدان بەم شێوەی ئیدارەدانی هەرێم لە لایەن پارتی و یەکێتییەوە، داهاتوو بە باش نابینێت.

ئاماژەی بەوەشکردووە کە لەم لاوازییەی هەرێمدا حکومەتی عێراق بڕوای بە فیدراڵییەت نییە و دەیەوێت دەسەڵاتی ناوەندی بەهێزتر بێت.

ئەو سیاسەتمەدارە ڕایگەیاندووە کە پارتی و یەکێتی کەرکوکیان لە دەستی کورد دەرهێناوە و حکومەتی عێراق موڵەتی ئەوە نادات دووبارە لە دەستی کورددا بێت و بە تەواوی بووەتە شارێکی عەرەبی.

ڕاشیگەیاندووە کە کورد هیچ ڕێگەچارەیەکی لە بەردەمدا نەماوە، تەنیا دەبێت لە گەڵ بەغدا بگاتە ڕێکەوتن، چونکە هەرێم بەشێکە لە عێراق و کۆمەڵگەی نێودەوڵەتیش هەموو کات جەخت لە سەر پاراستنی یەکپارچەیی عێراق دەکاتەوە.