حکومەتە خورمژەکەی مەسرور بارزانی
لە ئێستادا چیرۆک و گوزارشتی خورمژ سنوری بەکارهێنانی بۆ کەسەکان تێپەڕاندووە و لە هەرێمی کوردستان بۆ حکومەتەکەی سەرۆک وەزیرانی خۆڕاگر بەکار دێت.
حکومەتەکەی ئێستای هەرێمی کوردستان لە ڕووی یاساییەوە پاش بڕیارەکەی دادگای فیدراڵی عێراق بۆ هەڵوەشانەوەی پەرلەمانی کوردستان و بەڕێوەنەچوونی هەڵبژاردنی نوێ، شەرعییەتی نەماوە و کۆتایی هاتووە بەڵام لە سەر حوکم ماوەتەوە.
حکومەتەکەی مەسرور بارزانی مێوژی نەوتی هەرێمی لە بن هێنا و چاوی لە خورمای پارەی بەغداشە و خورمژی دەوێت.
زیندانەکانی لایەنی دەسەڵات لە حکومەتی هەرێم پڕن لەو کەسانەی کە تەنیا لە بەر ڕەخنەیەک ڕفێندراون، چاوی لەوەشە کەس ڕەخنەی لێنەگرێت و بەشان و باڵی ئازادییەکەیدا هەڵبدرێت.
ئەم حکومەتە لە ئاستی نێودەوڵەتیشدا پەراوێز کەوتووە و دەستەکەی لای هەمووان کەشف بووە و بەغداش لە سەردانە بێ ئەنجامەکانی بێزار بووە، هەرچی کۆمپانیای نەوت و کۆنسووڵخانە و نوێنەرایەتی وڵاتانیشە دەزانن کە ئەزموونی ئەم حکومەتە بە کەڵەک نەماوە و هیچ پرۆژە و بانگەشەیەکی چاکسازیش لە ماوەی زیاتر لە چوار ساڵی ڕابردوو سەرکەوتوو نەبووە و لە ڕاستیدا تەنیا درووشمێکی بێ کردار بووە.
حکومەتە خۆڕاگرەکەی هەرێم لە لایەک نەوت دەفرۆشێت و لە لایەک دەیان ملیار دۆلار قەرزدارە، دەیەوێت خەڵک برسی بێت و لە هەمان کاتیشدا بێدەنگ بێت، دەیەوێت خەڵک بچەوسێنێتەوە و چەپڵەشی بۆ لێبدەن، حکومەتە خۆڕاگەرەکە هەر ڕۆژە نەخۆشخانەیەکی ئەهلی دەکاتەوە و نەخۆشخانەکانی خۆی لە بێ مووچەیی فەرمانبەران و نەبوونی دەرماندا دادەخرێن، لە کەرتی پەروەردەشدا قوتابخانەکانی داڕووخاون و بانگەشەی سیستەمی خوێندنی ئەورووپی دەکات.
حکومەتێک بانگەشەی دیمۆکراسی دەکات و هەڵبژاردنەکان ساڵ بە ساڵ دوا دەخات، بانگەشەی ئازادی دەکات و پۆل پۆل خەڵک ڕەوانەی زیندانەکان دەکات، مووچە بە فەرمانبەرانی نادات و باسی سیستەمی بانکی و بە ئەلیکترۆنیکردنی دابەشکردنی مووچە دەکات.
ئەمەیە چیرۆکی حکومەتەکەی هەرێم کە بانگەشەی ئەزموونەکەی دەکرێت و دەڵێن با وڵاتانی ناوچەکەش لە ئێمەوە فێر ببن.
