حکومەتی بێ مووچە
لە کاتێکدا کە بەرپرسانی پارتی، یەکێتی و نەوەی نوێ لە ڕۆژانی ڕابردوو بەردەوام لە بەغداوە بانگەشەی دەسکەوتی ناردنی مووچەیان لە لایەن حکومەتی عێراقەوە کردووە، لە سلێمانی، هەڵەبجە، چەمچەماڵ، ڕاپەڕین و ناوچەکانی دیکە مانگرتنی سەرتاسەری فەرمانبەران، پزیشکان و بە گشتی مووچەخۆران ڕاگەێندرا. لە هەولێریش بە هۆی کەشی توندی ئەمنییەوە فەرمانبەران توانای دەربڕینی ناڕەزایەتییان نییە.
مانگرتووان ڕایانگەیاندووە کە نزیکەی دوو مانگە مووچەیان پێنەدراوە و لە گیرفانی خۆیان خەرج دەکەن و ناتوانن بەم شێوازە درێژە بە کارەکانیان بدەن.
ئەمەش لە کاتێکدایە کە حکومەتی هەرێم بە کردەوە مایەپووچ بووە و هیچی بە دەستەوە نەماوە، هەناردەی نەوت چەندین مانگە ڕاگیراوە و تەنیا حکومەتی عێراق دەتوانێت ئەم کێشە و قەیرانە کەم بکاتەوە.
ئەرکی حکومەتە خۆڕاگرەکەش بووەتە ئەوەی کە پارە لە بەغداوە بێت و مووچەی پێ دابەش بکات. بە واتایەکی دیکە، حکومەتی هەرێم بووەتە حکومەتێک بە دەستی بەتاڵ و توانای گۆڕینی ئەم دۆخەی نییە. خەڵکیش بەوە گەیشتوون کە درێژەدان بەم حکومەتە بە واتای بەردەوامبوونی کێشە و قەیرانەکانە.
