جیاوازی ژیانی بارزانییەکان و خەڵکی کوردستان
کوردستان بۆ بارزانییەکان و نەمانیش بۆ خەڵکەکەی. ملوانکە و بازنەی عەیار 24 و ئەنگوستیلەی زیو و کاتژمێری سویسری بۆ ئەوان و بەن و کندڕ و گوریس و فافۆن و ئاسن بۆ خەڵک. بەنزینی سۆپەر بۆ ئەوان و نۆرماڵی فیلپەمپ سووتێن بۆ خەڵک.
ڤێلای تەلبەنکراو و یاریگەی گۆڵف و گۆڕەپانی ئەسپسواری بۆ ئەوان و ڕوباری وشکبوو و لافاوی سزتان و بێ ئاویی هاوین بۆ خەڵک. ڤێزەی سویسرا و پاسپۆرتی دۆمنیکا بۆ ئەوان و شەش مانگ لە سەرەی هاتنەوەی کارتی نیشتمانی بۆ خەڵک.
کوردستان بۆ ئەوان و نەمانیش بۆ خەڵکی، کارەبای 24 کاتژمێری بۆ ئەوان و موەلیدە و دووکەڵ و ئەمپێری 15 هەزاری بۆ خەڵکی. قسەی گەورە و بێ کردار بۆ ئەوان و چەپڵەلێدان و پێداهەڵگوتن بۆ خەڵکی. خوێندنی ئەهلی و زانکۆی لەندەن و واشنتن بۆ ئەوان و قوتابخانەی درز و نیمچەڕووخاو و سەرگڵ بۆ خەڵکی.
پرۆژەی ستراتیژی و گوندی ئیتاڵی و ئەمریکی و ئەڵمانی بۆ ئەوان و گەڕەکی بێ ئاو و بێ کارەبا و بێ قیرتاو بۆ خەڵکی. سەرەی درێژی تەنکەری نەوت و غازی قاچاخ بۆ ئەوان و سەرەی بەنزین و بایع و ئاو و کارەبا بۆ خەڵکی. فڕۆکە و کۆپتەری تایبەت و ئۆتۆمبێلی ئاخر مۆدیل بۆ ئەوان و مازدای مۆدێل 80 و پیکابی 90 و ئۆپڵی 99 و ئۆتۆمبێلی قاچاخ بۆ خەڵکی.
شەربەتی فرێش و ئاوی نەع ناع و لیمۆ و پەنیری ئیتاڵی و تورکی بۆ سەر سفرەی ئەوان و نان و پیاز و باینجان بۆ خەڵکی. سروودی ئەی ڕەقیب و شەهیدان بۆ خەڵکی و ڕاپ و دانس و خۆبادان لە سەر شانۆ بۆ ئەوان. بەیاننامە و مەدح و قسەی بێ کردار و هەڵاتن لە شەنگال بۆ ئەوان و پێشەوەی سەنگەرەکان و سینگ دانە بەر گوللەی دوژمن بۆ خەڵکی. هەتیوبوون و بێکەسی و ڕووخاندنی خانووی منداڵانی شەهیدان بۆ خەڵکی و خوێندن بە دەست بەتاڵی و زگی برسی و سەرمای زستان و گەرمای هاوین بۆ خەڵکی و زانکۆ و ماستەر و دکتۆرای بێ ناوەڕۆک بۆ ئەوان.
بۆنی شانێل و لۆکاست بۆ ئەوان و بۆنی دووکەڵی موەلیدە و گزۆری دووتەنی بۆ خەڵکی. دۆلاری نەوت و یۆرۆی غاز بۆ ئەوان و 5 هەزاری و 10 هەزاری دڕاو و لیستی مووچەی بێ پارە بۆ خەڵکی.
ئەمە جیاوازی ژیانی خەڵکی کوردستان و بنەماڵەی دەسەڵاتداری بارزانییە کە کوردستان بۆ ئەوان و نەمانەکەی بۆ خەڵکە.
