بەزمی هات و نەهاتی 700 ملیار دینارەکە

کێشە و قەیرانی مووچەی مووچەخۆرانی هەرێمی کوردستان لە نێوان هەولێر و بەغدا بە چارەسەرنەکراوی ماوەتەوە و حکومەتە کەمتەرخەمەکەی هەرێم ڕایگەیاندووە تەواوی پابەندبوونەکانی جێبەجێکردووە، حکومەتی عێراقیش دەڵێت ئەوەی لە یاسای بودجەدا هاتووە جێبەجێ نەکراوە.

هەموو مانگێک باس و خواستی 700 ملیار دینارەکەی بەغدا سەرهەڵدەدات و مووچەخۆرانی هەرێم لە دڵەڕاوکێدا دەژین.

چوونی بەردەوامی شاندەکانی هەرێمی کوردستان بۆ بەغدا کۆتایی نایەت و تا ئێستا هیچ کێشەیەکی نەک تەنیا چارەسەر نەکردووە، بەڵکوو ڕەنگە بووبێتە هۆی توڕەیی دەسەڵاتدارانی حکومەتی عێراق و وەک زانیارییەکان باس دەکەن محەمەد شیاع سودانی بە شاندەکەی ڕاگەیاندووە کە چیتر کاتی ئەو نەگرن.

قەیرانی دواکەوتن، پاشەکەوت و لێبڕین و ئێستاش پێنەدانی مووچە لەو کاتەوە سەریهەڵدا کە دەسەڵاتدارانی هەرێم بە ناوی ئابوری سەربەخۆوە ڕاستەوخۆ و بە بێ ڕەزامەندی بەغدا نەوتیان هەناردەی دەرەوە کرد.

شکستی سیاسەتەکەش وایکردووە کە 9 ساڵە قەیرانە مووچە لە هەرێمی کوردستاندا هەیە و هیچ ئاسۆیەکیش بۆ چارەسەرکردنی نییە.

حکومەتی عێراق لە سێ مانگی ڕابردوودا بڕیاریدا سێ 700 ملیار دینار، واتە ترلیۆنێک و 100 ملیار دینار وەک قەرز بۆ دابەشکردنی مووچەی مووچەخۆران ڕادەستی حکومەتی هەرێم بکات بەڵام هێشتا 700 ملیار دیناری سێهەم نەهاتووە و ناڕەزایەتییەکانیش لە دژی دەسەڵاتدارانی کوردستان گەیشتووەتە لوتکە. پارەکەش بۆ ئەوەیە کە حکومەتی هەرێم لە مانگی 12 مووچەی مانگی 9 ی 2023 دابەش بکات.

مەسرور بارزانی و وەزیرەکان و وتەبێژەکانی بەرپرسیاریەتی ئەمەیان خستووەتە ئەستۆی بەغدا و دەسەڵاتدارانی عێراقیش دەڵێن حکومەتی هەرێم لەم دۆخەی ژیانی خەڵک و بێ مووچەیی مووچەخۆران بەرپرسیارە.

فەرمانبەران و مامۆستایانی هەرێم کاتێک داوای مووچە لە حکومەتەکەی بنەماڵەی بارزانی دەکەن دەڵێن لە ئەستۆی بەغدایە و کاتێک دەیانەوێت بچنە بەغدا لە بازگەکان ڕێگرییان لێدەکرێت.

لە ئێستاشدا لە ناوەڕاستی هەر مانگێکەوە پرسی هاتن و نەهاتنی 700 ملیارەکەی بەغدا لە کوردستان سەرهەڵدەداتەوە. ئەم پرسە تەواوی پەرلەمانتاران و بەرپرسانی کورد و میدیا کوردییەکان و سۆشیاڵ میدیای بە خۆوە سەرقاڵ کردووە، بە بێ ئەوەی کە کەس زانیاری تەواوی لە سەر هاتنی پارەکەی بەغدا هەبێت، تەنانەت سەرۆکی حکومەتی هەرێمیش نازانێت بەغدا ئەو پارەیە دەنێرێت یان نە.