بابەکر زێباری: هاوپەیمانان هیچ گرنگییەک بە هەرێمی کوردستان نادەن

ڕاوێژکاری سەربازی سەرۆکی هەرێمی کوردستان ڕایگەیاندووە کە لە ئێستادا هاوپەیمانان هیچ گرنگییەک بە هەرێم و هێزی پێشمەرگە نادەن.

بابەکر زێباری ڕایگەیاندووە کە هێزی پێشمەرگەی کوردستان لە هەموو ڕوویەکەوە پێویستی بە هاوپەیمانان هەیە بەڵام ئەمریکا و وڵاتانی دیکەی هاوپەیمانی نێودەوڵەتی هیچ گرنگییەک بە هێزی پێشمەرگە نادەن و بە دۆست و هاوپەیمانی خۆیانی نازانن.

ئاماژەی بەوەشداوە کە سەرجەم وڵاتانی هاوپەیمان پلانی پاشگەزبوونەوەیان لە هاوکاریکردنی هێزی پێشمەرگە داڕشتووە، ئەویش بە هۆی ململانێ سیاسییەکانی هەرێمی کوردستان و ڕێگری لە یەکخستنی هێزەکان لە چوارچێوەی وەزارەتی پێشمەرگەدا.

بابەکر زێباری دەڵێت کە هاوپەیمانان لەو بڕوایەدان کە هێزی پێشمەرگە سەرباری ئەو هەموو هاوکارییەی کراوە، لە شەڕی دژ بە داعش دەسکەوتێکی وەهای نەبووە و هەروەها ئەو چەک و تەقەمەنییەی بە هێزی پێشمەرگە دراوە لە لایەن حزبەکانەوە دزراوە و کەڵکی نیشتمانیی لێوەرنەگیراوە.