ئەبوبەکر کاروانی یەکگرتووی ئیسلامی بەرەو کوێ دەبات؟
کاروانی لە بەرنامەیەکی تەلەفزیۆنیدا ڕایگەیاندبوو کە سەلەفییەکانی کوردستان داعشێکی بێ چەکن.
کاردانەوەی سەلەفییەکان لە بەرامبەر لێدوانەکەی ئەبوبەکر کاروانی و داواکەی عەبدوللەتیف سەلەفی وایکرد کە یەکگرتووی ئیسلامی کوردستان بە فەرمی ڕوونکردنەوەیەک بڵاو بکاتەوە.
لەو ڕوونکردنەوەدا هاتووە کە ئەبوبەکر کاروانی هیچ پۆستێکی لە ناو یەکگرتووی ئیسلامیدا نییە و لێدوانەکانی بە بۆچوونی خۆی هەژمار دەکرێن.
یەکگرتووی ئیسلامی کوردستان لە مامەڵەی ژمارەیەک لە سەرکردەکانی پێشووی نیگەرانە کە پلەی وەزیری و پەرلەمانتارییان هەبووە.
بەدەر لە نیگەرانییە گشتییەکانی یەکگرتووی ئیسلامی کوردستان لە بەرپرسان و پلەدارانی پێشووی ئەم حیزبە، سەڵاحەدین بەهائەدین ئەمینداری گشتی یەکگرتوو بە دیاریکراوی لە ئەبوبەکر کاروانی نیگەرانە کە لە دوو کۆنگرەدا خۆی بۆ پۆستی ئەمینداری گشتی یەکگرتوو کاندید کرد و شکستی هێنا.
لەو دوو کۆنگرەدا کە ئەبوبەکر کاروانی خۆیی کاندید کرد، بانگەشەی چاکسازی و گۆڕانکاری ناوخۆیی دەکرد بۆ سیاسەت و شێوازی کاری حیزبی لە یەکگرووی ئیسلامی و بەوە دەناسرێت کە سەرکردایەتی باڵی ڕیفۆرمی یەکگرتووی ئیسلامی دەکات.
